De Bands, de bi dat Finale in Ollenborg mitmaakt, staht fast!

Ok wieldat de Bidrääg so ünnerschedlich sünd, weer dat nich eenfach, mang de Bewarvers ´n Wahl to drepen. Rock, HipHop un Klassik mit’nanner to verglieken, is meist nich mööglich. Un so verscheden de Bidrääg weren, so veel Indruck maakt ok ehr starken Sieden: gode Musik, originelle Texten oder ´n besünnern Ümgang mit de plattdüütsche Spraak. Kott, ´n swore Opgaav weer dat. Man wieldat nich all Bewarvers optreden künnt, müss dat nu ´n Utwahl geven. Un blangenbi is dorbi jo ok noch de Spannung anwussen, dat een dat nich mehr uthollen kunn. Dormit is nu Sluss, denn nu staht se fast, de Bands, de tokamen Sünnavend in Ollenborg mit vun de Partie sünd:

Voodoolectric · Musikapparillo · Triple Seven
Platt im Kopp · Knallkööm · NotMade · Duo Evina
BLOWM · Maschgold · Skyline B

Online-Voting

Wokeen an’n Sünnavend in Ollenborg winnen warrt, weet noch nüms. En Priesdreger steiht allerdings nu al fast. Mit 1010 Stimmen hett Skyline B bi dat Online-Voting de meisten Stimmen kregen. Den Publikumspries gifft dat an’n Sünnavendavend in de Exerzierhall. Wi graleert nu al maal! Dormit ji dat Endergeevnis mit all Drüm un Dran ankieken künnt, mööt ji op dat Bild klicken.