„Platt is cool“ – nich bleoß bäi ösch in ´n Norden. Plattsounds lirbert däin paasenden Soundtrack tau däi Sprärke: däi Bandcontest startet in däi 11. Runne, un junge Löije ut Niersassen, däi Musäik märket, kürnt seck niu för dat Finale an 20. November 2021 in Stadthoagen bewerben. 10 Bands un Solo-Künstler*innen stährt denn in „Kulturzentrum Alte Polizei“ uppe Bühne un wäiset, wue gaut Plattdöitsch un Musäik teheope passet. Däi Musäiker speelt mihe ürn Songs ümme däi ersten drei Plätze un kürnt Preisgeller in Höchte van 1000, 600 un 300 Euro gewinnen. Anmelln kürnt seck van niu an junge Löije ut Niersassen, däi Musäik märket, un Songs ut Rock, Pop, Hip Hop, Urban, Electro, Punk, Reggae, Metal eoder as Singer/Songwriter up Platt taun besten girben witt.

„Coronabedingt hat mösst dat Finale in 2020 zwar online stattfinnen, ärwa et is trotzdem ´n greoten Erfolg esäin. In düssen Joahr hoffe wäi, datt däi Finalist´*innen wiar live uppe Bühne te seihen sind“, seggt Seegers´ Lu, Geschäftsführerin vanne Schaumbörchschen Landschaft, däi eok in düssen Joahr däin Bandcontest veranstaltet. Seegers´ Lu hoffet up masse Bewerber*innen ut ganz Niersassen un eok ut ´n Schaumbörchschen Lanne. An Leiwesten hürt öt Bäidräige ut ´n Bereich Hip Hop: „Dat is jo all ne ‚sehr sprachliche‘ Musäik un dordür ideal för Plattsounds“, secht Seegers.

Eok däi Gewinner Majanko ut Wilhelmshaven is van Plattsounds begeistert esäin, un well wiar mihemärken: „Wäi freuet ösch all up dat näichste Märl. Wäi sind girn wiar dorbäi, ümme däin Titel te verteidigen“, secht däi Sänger Bauer´s Majanko.

Däi Jury bestaht wue in 2020 wiar ut Denise M’Baye (Sängerin / Schauspielerin), Jakobus Durstewitz (Musäiker/Sänger bäi JaKönigJa), Ilka Brüggemann (NDR 1) und Stefan Meyer (Oldenbörchsche Landschaft). „Däi Ärbend was ´n plattdöitschen Segen“, secht M’Baye´s Denise ärwa dat Finale van vörgen Joahr. „Eck sinn wiar in düsse heitere und woarme Sprärke verliebt un in däi Löije, däi platt kürt un bäi Plattsounds eok up platt singet.“ Moderäiert werd däi Show van däi Sängerin un Schauspielerin Heger´s Annie. As Plattsounds-Botschafter werd wiar däi Moderator, Sänger un Plattschnacker Dibaba´s Yared in däin sozialen Medien wat Näijet van däin Bandcontest vertelln.

Musäiker, däi seck för dütt Projekt begeistert, briuket kein Platt te kürn. Et recket, wenn se seck mihe´n Läid van seck anmellt, ´ne Ärwasettunge gifft et denn van däin Plattsounds-Team. Dornär mott bleoß noch ´ne plattdöitsche Version van däin Stücke innerecket wirn. Van alln plattdöitschen Stücken wird denn däi Finalisten utewäihlt, däi denn uppe Bühne stährt un plattdöitsch singet. Wer mihemärken well, schall nich jünger as fufftahn (15) un nich öller as drüttich (30) Joahr eold säin un ut Niersassen kurm eoder niu doar wuhrn.

Wäi freuet ösch up masse Bewerbungen bett taun 30. September 2021. Däi Teilnährmebedingungen kürnt jäi häija närläisen.