Die Band Zorrows beim Plattsounds Bandcontest 2021

De plattdütsche Bandcontest „Plattsounds“ is wat for junge Nahwuss-Musikers-Lüe in den Older von 15 bet 30 Johre. Nu kummt „Plattsounds“ nah Brönswiek. Bie den Wettbewarb was taulest de Band El Andaluz ut Wulfenbüttel dabie. In de Johre davor häbbet all mehre Bands ut den Brönswiekschen Lanne midde emaket un wecke häbbet dabie wat ewunnen.

For Bands oder Enzel-Lüe (Singer/Songwriter) sind allesamt 10 Startplätze tau vergeben. Jeder Vordrag is en enzelnen Song ut de Genres wie Rock, Pop, Hip Hop, Punk, Reggae oder Metal. Dat Finale „Platt-Grand-Prix“ is an Sönnabend, 19. November 2022, in den „Lokpark Braunschweig“. Bewarben for den 12. Wettbewarb könnt sik junge Nahwuss-Musikers-Lüe ut Neddersassen all nu, taulest an den 30. September 2022. Wie dat geiht, is bie „www.plattsounds.de“ anegeben.

De Besonnerheit bie „Plattsounds“: Alle Biedräge möt en plattdütschen Text häbben. Uk Lüe, de noch nich „Plattdütsche“ sind, könnt middemaken. De Initiatoren von den Wettbewarb helpet, wie uk Plattprofis ut de Regionen. De Hülpe besteiht in den Obersetten in de Plattdütsche Sprake un in de Hülpe bie den Insingen. Dat Bewarben geiht uk mit en Song in ne andere Sprake. In den Finale mott de Song denne aber mit den plattdütschen Text voredragt weern. De Song mott wat eigenet wesen, nich ne Coverversion von süsswat.

Veranstalter von „Plattsounds 2022“ is de „Braunschweigische Landschaft e. V.“. Von Gerhard Radeck, den Böbbersten von de Landschaft, was sau tau vernehmen: „Wi freuet üsch, dat wi düsset Johr de Gastgeberin von „Plattsounds“ un dat Finale „Platt-Grand-Prix“ wesen dört. Damidde gift et denne ne Plattform for dat musikalische Mitenander von Heimatgefeuhl un den nieen Tietgeist. Dat Projekt von Landschaften un Landschaftsverbände in Neddersassen well mit den Finale in Brönswiek besonners uk junge Lüe ut den Brönswiekschen Lanne anspreken. Mit coole plattdütsche Musike in use Regionalsprake Ostfälischet Plattdütsch – dat is wat.“

In den Wettbewarb gift et Priese, 1.000 € for Platz 1 un 600 € for Platz 2 un 300 € for Platz 3. In en „Online-Voting“ weerd noch 300 € for den „Publikums-Liebling“ egeben. Ne besonnere Upgabe hat dat Priesgericht denne nahdeme uk noch tau maken. Et mott ut de Wettbewarbs-Biedräge dat „beste plattdeutsche Lied des Jahres“ rutfinnen. – Dat Priesgericht besteiht betlang ut Ilka Brüggemann (NDR 1), Stefan Meyer (Oldenburgische Landschaft) un Hilka Jeworrek (Platt-Fluencerin Ballerdutje). Dor dat Finale wiest – mit anseggen un vorstellen – de Sängerin un Schauspeelerin Annie Heger.