23Mär/17
Plattsounds Bandcontest

Plattsounds Bandcontest 2017 geiht los

De plattdüütsche Musikwettstriet Plattsounds geiht in de neegst Runn un wannert wieder in Neddersassen: de söövte Wettstriet findt statt in Celle an ´n 28. Oktober. Utrichter is dit Johr de Lümborgsche Landschapsverband. Anmellen künnt sik junge Lüüd un Bands ut Neddersassen, de Musik maakt, bit to ´n 15. September. Teihn Bewerber künnt an ´n Finale in de CD Kaserne mit jümehr plattdüütsched Leed optreden.

Dat Team vun Plattsounds freit sik över vele Bewerber un vele ne ´e Oorten vun Musik. In de letzten Johren hebbt wi Rock, Pop, HipHop, Punk, Metal, Singer-Songwriter, Rockabilly oder Acapella hürt. Aver wi freit uns, wenn wi ok mal Reggae, Ska, RnB or elektronische Musik hüren künnt.

Op de Musiker tövt in Celle en grote Bühn un en Utsicht op Pries vun 1000,-, 600,- or 300,- Euro. Un de Tokiekers künnt sik op Musik in der coolste Spraak ut den Norden freien. Wi jedenfalls freit uns op vele Deelnehmers.

Dat Team vun Plattsounds