Bi dat Finale vun Plattsounds 2017 an ´n 28. Oktobermaand in Celle sünd teihn Bands mit jümehr plattdüütsch Songs in ´n Wettstriet. Dorbi is en Jury, de veel vun Musik un Plattdüütsch versteiht. De Lüüd in de Jury kommt ut de Plattdüütsch- or Kulturszene in Neddersassen:

Ilka Brüggemann kummt ut Amelinghusen bi Lümborg un is Plattdüütsch opwussen. Bi Radio NDR1 maakt se plattdüütsche Sennen un schrifft för de Reeg „Hör mal ´n beten to. Ilka Brüggemann hett ´n Doktortitel in Ingelsch un Pollitik. Een kann ehr ok live mit Plattdüütsch un bi Lesungen beleven.

Mire Buthmann maakt mit de „Tüdelband“ plattdüütschen Pop. Se sünd un in ganz Norddüütschland ünnerwegens un geevt Konzerte. Letzt Johr hett de Tüdelband en frisch Album rutbröcht mit den plattdüütschen Naam „Ganz groot“. Mire kummt ut Hamborg un steiht in de Band vörnan un singt. Aver se schrifft ok Leder un speelt Gitarr, Klavier un Akkodeon.

Hendrik Deutsch hett Kultur-Wetenschop studiert un arbeidt as Bildungsreferent för Pop-, Rock- un Weltmusik bi de Landesmusikakademie in ´n Landesmusikrat Neddersassen. Sein Opgaven sünd Rock- un Popmusikförderung, Popstipnedien, Weltmusik un de Utbillen vun Musikmentoren.

Kai Thomsen is Schoolmester un hett as Dozent för Musik-Wetenschop un Musikpädagogik arbeidt. He hett ok wat schreven över Medien un Musikmarketing, maakt aktiv Musik un hett dat Seggen in de CD-Kaserne. Vun 1994 an kümmert sik Kai Thomsen in ´n Opdrag vun ´n Landesmusikrat, vun ´n düütschen Musikrat un ünnerschiedlich Universitäten üm Bands un Künstler.

Stefan Meyer arbeidt för de Ollenborgsche Landschop, un dat sotoseggen blots för de plattdüütsche Spraak. He hett egens Sozial-Wetenschop studeert, aver nu organiseert he Veranstalten op Platt, wie to ´n Bispeel PLAttart. Dat is en groot Regionalspraken-Festival. Stefan Meyer kennt Plattsounds vun Anfang an. He hett Plattsounds mit in Gang bröch un veer Johr in de Organisatschoon mitarbeidt.

De Jury beweert de plattdüütsche Utspraak, de Qualität vun Musik un Texten un wat de Lüüd so allens so op de Bühn maakt. Besünners goot is jümmer, wenn de plattdüütschen Leder in en ganz annern kreativen Tosamenhang präsenteert warrt. En Kombinatschoon mit modern Musik as Rock, Pop, Punk, HipHop or Metal is willkamen.